އަޅުގަނޑު ދެކޭގޮތުގައި އެ މާއްދާ ބިލުން އުނިކުރުމަށް ބޭނުންވި މީހުންނަށް، އެ މާއްދާ އެ ބިލުގައި ނެތުމުން ލިބޭނެ އުފަލެއް ނެތެވެ. އަދި، އެ މާއްދާ ބިލުގައި ނެތުމުން ހިތްހަމަނުޖެހުނު މީހުންގެ މެދުގައި އުފެދެންޖެހޭ ކަންބޮޑުވުމެއްވެސް ނެތެވެ.

އަޅުގަނޑު އެހެން މިދަންނަވަނީ، އަންނަނިވި ސަބަބުތައް އެހެން ހުރުމުންނެވެ.

ފުރަތަމަ

ސުޕްރީމް ކޯޓަކީ، ޤާނޫނުއަސާސީއާއި ޤާނޫނުން އެ ކޯޓަށް ދޭ ވަކިވަކި ބާރުތަކުގެ އިތުރުން، އެ ކޯޓަކީ، ސުޕްރީމް ކޯޓު ކަމަށްވާތީ، އެ ކޯޓުގެ ޒާތުގައި، އެ ކޯޓުގެ ތަބީޢަތުގައިވެސް އިތުރު ބާރުތަކެއް ލިބިދޭ ކޯޓަކަށްވާކަން.

އަދި، މިކަން، ކޯޓުތަކުގެ ބިލުގައިވެސް ބަޔާންވެ ކަށަވަރުވެގެންވާކަން.

ދެވަނަ

ސުޕްރީމް ކޯޓަކީ، އެ ކޯޓުގެ ނިންމުންތަކަށް ތަބާވުން އެ ކޯޓުގެ ދަށުގައިވާ ކޯޓުތަކަށް ލާޒިމުކުރާ ކޯޓެއްކަމުގައި ވީނަމަވެސް، ސުޕްރީމް ކޯޓަކީ، އެ ކޯޓުގެ އަމިއްލަ ޙުކުމްތަކުންވެސް ބަނދެވޭ ކޯޓަކަށް ނުވާކަން.

އަދި، އެ ކޯޓުގެ ޙުކުމެއް ބަދަލުކުރުމާއި އެކަހެރިކުރުމާއި އެ ޙުކުމަކާ ދުރަށް ދިޔުމަކީ، ސުޕްރީމް ކޯޓަށް ކުރެވިދާނެކަމަކަށް ވާކަން.

އަދި، މިކަން މިހެން އޮންނަނީވެސް، ނިޔާކަނޑައެޅުމާއި އިންސާފު ގާއިމުކުރުމުގެ އެންމެމަތީ ކޯޓަށް އެ ކޯޓުވާތީ، އެ ކޯޓުގެ މަޤްޞަދަށާއި ހައިސިއްޔަތަށާއި ވާޖިބަށް ދެވޭ އަހައްމިއްޔަތެއްގެ ބޮޑުކަމުން ކަމުގައިވާކަން.

އަދި، މިކަން، ކޯޓުތަކުގެ ބިލުގައިވެސް ސާފުކޮށް ބަޔާންކޮށްދީ ކަށަވަރުކޮށްދީފައިވާކަން.

ތިންވަނަ

އުނިކުރުމަށް ނިންމި މާއްދާއަކީ، ޤާނޫނުއަސާސީއާ ނުވަތަ ޤާނޫނާ ކަނޑައެޅިގެން ޚިލާފު ނިންމުމެއްގެ ސަބަބުން، ޢަދުލު އިންސާފު ގާއިމު ނުކުރެވިވާނަމަ، އެ މައްސަލަ އަލުން ބަލައިދިނުމަށް ސުޕްރީމް ކޯޓަށް ހުއްދައެއްދޭ މާއްދާއަކަށް ނުވާކަން.

އަދި، އެ މާއްދާއިން ކުރާކަމަކީ، އެފަދަ މައްސަލަތައް ބެލުމުގައި ސުޕްރީމް ކޯޓުން ޢަމަލުކުރަންޖެހޭ އުސޫލުތަކެއް ކަނޑައަޅައިދިނުން އެކަނިކަން.

އެގޮތުން، އެ މާއްދާއިން ކުރާކަމަކީ، އެފަދަ މައްސަލައެއް ސުޕްރީމް ކޯޓަށް ބަލައިދެވޭނީ، ބިލު ޤާނޫނަކަށްވާތާ ނުވަމަސް ދުވަސްތެރޭ ހުށަހަޅައިފިކަމަށްވާނަމަ ކަމަށް ބުނުމާއި، އެފަދަ މައްސަލައެއް ބަލައިދެވޭނީ، ސުޕްރީމް ކޯޓުން ވަކި މަރުޙަލާތަކެއް ކަޑައްތުކުރުމަށް ފަހުގައިކަމަށް ބަޔާންކުރުންކަން.

އެ އުސޫލުތައް ހިމަނާފައި އެވަނީ، އެފަދަ މައްސަލަތައް ބެލުމުގައި އަމަލުކުރާނެ ގޮތް ކަނޑައެޅުމުގެ ފުރިހަމަ އިޚްތިޔާރު އެ ކޯޓަށް ދޫކޮށްލުމުގެ ބަދަލުގައި، އެ އިޚްތިޔާރު ބޭނުންކުރާނެ ގޮތުގެ މައިގަނޑު އުސޫލުތަކެއް ޤާނޫނުގައި ކަނޑައަޅައިދިނުމުގެ ބޭނުމުގައި ކަމުގައިވުން.

ހަތަރުވަނަ

އެ މާއްދާ އުނިކުރުމުން މިވީގޮތަކީ، އެފަދަ މައްސަލަތައް ބަލައިގަތުން އެއީ، ސުޕްރީމް ކޯޓު ސުޕްރީމް ކޯޓަށްވީތީ އޭގެޒާތުގައި ލިބިދޭ ބާރުގެ ދަށުން ކުރެވިދާނެ ކަމަކަށް ބަދަލުވެގެން ދިޔުންކަން.

އަދި، އެފަދަ މައްސަލަތައް ބަލައިގަތުމުގައި އަމަލުކުރާނެ ގޮތެއް ޤާނޫނުގައި ކަނޑައަޅައިދީފައި ނުވާތީ،  ސުޕްރީމް ކޯޓުން، އެ ކޯޓުގެ އަމިއްލަ ޒާތުގައި، އެ އުސޫލުތައް ކަނޑައަޅައި، އެކަންކުރުމަށް މަގުފަހިވެގެން ދިޔުންކަން.

ނަތީޖާ

އަޅުގަނޑު ދެކޭގޮތުގައި އެ މާއްދާ ބިލުން އުނިކުރަން ބޭނުންވި މީހުން އެކަންކުރަން ބޭނުންވީ ވަކިކަހަލަ ޔަޤީންކަމެއް ހޯދުމުގެ ނިޔަތުގައިކަމަށް ވީނަމަވެސް، އެ މާއްދާ އުނިކުރުމުން، މި ނުކުތީ އެ ނަތީޖާއެއް ނޫނެވެ.

ޙަޤީޤާތުގައި މިވީގޮތަކީ، އެފަދަ މައްސަލަތައް ބެލުމާއި އެފަދަ މައްސަލަތައް ބެލުމުގައި ޢަމަލުކުރާނެގޮތް ކަނޑައެޅުމުގެ މުޠުލަޤު ބާރު، އެހެން ދޮރަކުން، ސުޕްރީމް ކޯޓަށް ފުރިހަމައަށް ލިބިގެން ދިޔުމެވެ.

އެ މާއްދާ ބިލުގައި އޮތްނަމަ އެއްކަމެއް ހަމަގައިމުވެސް ޔަޤީންވީހެވެ.

އެއީ، އެފަދަ މައްސަލަތައް ސުޕްރީމް ކޯޓުން ބަލައިގަތްކަމަށް ވީނަމަވެސް، އެފަދަ މައްސަލަތައް ބެލުމުގެ އުސޫލުތަކެއް ކޯޓުތަކުގެ ޤާނޫނުގައި ބުނެދެވިފައި އޮތުމެވެ. އަދި، އޭރުން ދެން އެކަހަލަ މައްސަލަތައް ބަލާނީ އެ އުސޫލުންކަން ޔަޤީންވުމެވެ.

އެކަމަކު، މިހާރުމިވީ ގޮތަކީ، އެކަން ސުޕްރީމް ކޯޓުގެ އިޚްތިޔާރަށް ދޫކޮށްލެވި، އެ ބޭނުންވި ޔަޤީންކަން އަނެއްއަތަށް ފުރޮޅިގެން ދިޔައީއެވެ.

ސުޕްރީމް ކޯޓަކީ، އެ ކޯޓުގެ ޒާތާއި ޠަބީޢަތުގައި ބާރުތަކެއް ލިބިދޭ ކޯޓަކަށްވާތީއެވެ. އެ ކޯޓު ހިންގާނެގޮތުގެ ގަވާއިދު ކަނޑައަޅާނީ އެ ކޯޓުން ކަމުގައި ޤާނޫނުއަސާސީ ބުނާތީއެވެ.

އަދި، މިހާރު އެ ކޯޓު ހިންގާ ގަވާއިދު ބުނާގޮތުންވެސް، އެ ގަވާއިދުގައި ބުނެފައި ނެތްކަމެއް ދިމާވެއްޖެނަމަ އެކަން ނިންމާނީ، އެ ކޯޓުގެ ފަނޑިޔާރުންގެ އަޣްލަބިއްޔަތުން ކަނޑައަޅާ ގޮތެއްގެމަތިން ކަމުގައި ބުނާތީއެވެ.

ޤާނޫނީ ދާއިރާގަޔާއި ޝަރުޢީ ދާއިރާގައި މަސައްކަތްކުރާ މީހުންނަށާއި އެ ކޯޓުތައް މެދުވެރިކޮށް މައްސަލަތައް ބަލަމުން އިސްތިޢުނާފުކުރަމުންދާ ފަރާތްތަކަށްވެސް އެ ބިލަކީ އަވަހަށް ފާސްވުން މުހިންމު ބިލަކަށްވިއެވެ.

އެކަން އެގޮތަށް ނުވުމުން، އެކަމާ އެންމެ ބޮޑަށް މާޔޫސްވި އެކަކަށް އަޅުގަނޑުވެސްވާނެއެވެ. އެކަމާ ހިތްހަމަ ނުޖެހުނު އެކަކަށްވެސް އަޅުގަނޑު ވާނެއެވެ.

އެ ބިލު، ރޭ އޮތް މަޖިލީހުގެ ޖަލްސާއާ ހަމައަށް އެގޮތަށް ގެންގޮސްދިނުމަށް، މި ރޯދަމަހު ކުރެވުނު ގިނަ މަސައްކަތްތަކުގެ އެންމެ ބޮޑު އެއް ހިއްސާ އަދާކުރި އެކަކަށް އަޅުގަނޑުވެސްވާތީއެވެ.

ކޯޓުތަކުގެ މަސައްކަތާއި ބާރާއި ހިންގުމާގުޅޭ އުސޫލުތައް ބަޔާންކޮށްދިނުމުގެ ޤާނޫނުގެ ބިލު، ކޯޓުތަކުގެ ބިލަކީ، ޤާނޫނުއަސާސީގެ ދަށުންވެސް މުހިންމު ބިލެކެވެ.

ޤާނޫނުއަސާސީގެ ދަށުން އަންނަންޖެހޭ އެ ޤާނޫނު ނާންނަހާހިނދަކު، ރާއްޖޭގެ ކޯޓުތައް، މި ޤާނޫނުއަސާސީގެ ދަށަށް ފުރިހަމައަށް ހިޖުރަކުރުމަށް އުދަނގޫވާނެއެވެ. ކޯޓުތަކުގެ އެފުދުމާއި ހިންގުމާއި މަސައްކަތާ އެހެނިހެން ކަންކަން ޤާނޫނެއްގެ ދަށުން ސާބިތުކަމާއެކު ނިންމައި ނުދެވޭތީއެވެ.

ޤާނޫނުއަސާސީ އައިފަހުން މިވީހާދުވަހު އެ މަސައްކަތް ނުކުރެވި އޮތުމަށްފަހު، އިންތިޤާލީ މަރުޙަލާގެ ކަންކަން ނިންމުމަށް މަޖިލީހުގައި މަސައްކަތްކުރުމަށް، ސިޔާސީފެންވަރުގައި އާ ރޫޙެއް އުފެދިގެންދިޔަ ހިސާބުން، ފަނޑިޔާރުންގެ ބިލާއި ކޯޓުތަކުގެ ބިލު ނިންމުމަށް، ޚާއްޞަ އުސޫލަކުން، އާ މަސައްކަތްތަކެއް ފެށުނެވެ.

އެގޮތުން ފަނޑިޔާރުންގެ ބިލު މި ހުސްވި އޯގަސްޓުމަހުގެ ފުރަތަމަ ދިހައިގެ ތެރޭގައި ނިންމުމަށްފަހު، ދެން ފޯކަސްކުރެވުނު ބިލަކީ، ކޯޓުތަކުގެ ބިލެވެ. އިންތިޤާލީ މަރުޙަލާއާ ސީދާ ގުޅުންހުރި ބިލެއްގެ ގޮތުގައެވެ.

ޝަރުޢީ ދާއިރާ ރަނގަޅަށް ހިނގަން ފަށައި، އެ ދާއިރާގެ މަންޒަރު ފުރިހަމަވާނީ، އެ ބިލުވެސް ފާސްވެ ޤާނޫނަކަށް ވުމުންކަމަށް ވާތީއެވެ.

އަޅުގަނޑުގެ ފެންވަރުގައި ފަރުދެއްގެ ހައިސިއްޔަތުން ވިސްނާއިރު، މި ރަމަޟާންމަހުން މިވީ ދުވަހެއް ގާތްގަނޑަކަށް ހޭދަވެގެން މިދިޔައީ، ކޯޓުތަކުގެ ބިލު ފުރިހަމަކުރުމުގައެވެ. އެ ބިލު، އޯގަސްޓު ނިމެންވާއިރަށް ނިންމުމަށް އެކުލަވާލެވުނު ޓީމުގެ މަސައްކަތުގައެވެ.

ރަސްމީ ބައްދަލުވުމުގައި ތިރީސް ގަޑިއިރު މަސައްކަތްކުރުމުގެ އިތުރަށް، ދިމާވި މައްސަލަތަކަށް ޙައްލު ހޯދުމަށް ވިސްނި ވަގުތާއި، ކުރި ދިރާސާގެ ވަގުތާއި، ކިޔުނު ޑްރާފްޓުތަކުގެ ވަގުތާއި، ޑްރާފްޓުތައް ބަލައި ހިމުން ކުރުމުގައި ހޭދަވި ވަގުތާއި، ކަމާ ގުޅުންހުރި މީހުންނާ ބައްދަލުކޮށް ވާހަކަ ދެއްކުމުގައި ހޭދަވި ވަގުތު އެއީ މި މަސައްކަތަށް އަޅުގަނޑު ދިން އަހަމިއްޔަތުގެ ތެރޭގައި ގެއްލިގެންދިޔަ ވަގުތެވެ.

މަސައްކަތް ޙަވާލުވި ޓީމުގައި އެމް.ޑީ.ޕީގެ ފަރާތުން ހިމެނުނީ، އަޙްމަދު ޙަމްޒާއެވެ. ޑީ.އާރު.ޕީގެ ފަރާތުން ހިމެނުނީ މުޙަންމަދު ޙުސައިނެވެ. ދެން އެ ޓީމުގައި ހިމެނުނީ އަޅުގަނޑެވެ.

އެ ޓީމު މަސައްކަތްކުރީ، އެ ބިލު ދިރާސާކުރަން ކުރިން ޙަވާލުވެފައިއޮތް ކޮމިޓީކަމުގައިވާ މިނިވަން މުއައްސަސާތަކުގެ ކޮމިޓީގެ ކުޑަ ކޮމިޓީއެއްގެ ގޮތުގައެވެ.

ކޯޓުތަކުގެ ބިލަކީ ސިޔާސީ ބިލަކަށްވުރެ ބޮޑަށް، ވަރަށް ފަންނީ، ވަރަށް ޝަރުޢީ ބިލެއްކަމުން، އެ ބިލު މިހާރު އޮތްގޮތަށް ބަދަލުކުރުމުގައި ކޯޓުތަކާއި ޕްރޮސެކިއުޓަރ ޖެނެރަލާއި ފަނޑިޔާރުންނާއި ވަކީލުންގެ ލަފަޔާއި މަޝްވަރާ ރަސްމީގޮތުންނާއި ނުރަސްމީގޮތުން ހޯދުނެވެ.

އަދި، ބިލަށް އެކިފަރާތްތަކުން ފޮނުއްވި ކޮމެންޓުތައް ވަކިވަކިން ފުރާނައި ބަހުސްކޮށް ހެދުނެވެ. ބިލުގެ ކޮންމެ މާއްދާއެއް ވަކިވަކިން ކިޔައި، އެއިން ކޮންމެ މާއްދާއެއް އެކިގޮތްގޮތަށް ފުރޮޅައި، އެހެން ހެދުމުން ނުކުންނަ މާނަކުރުންތަކަށް ވާހަކަ ދެކެވުނެވެ.

މައްސަލަ އުފެދުނު މާއްދާތަކާއި އުސޫލުތަކާ ގުޅޭގޮތުން، މައިގަނޑު ދެ ޕާޓީގެ ވިސްނުން ހުރިގޮތް ބެލުނެވެ. ޚިޔާލުތަފާތުވުން އޮތް ކަންކަމުގައި، މެދުމިނުގެ ޙައްލެއް ފެނޭތޯ މަސައްކަތް ކުރެވުނެވެ.

މިހުރިހާ މަސައްކަތަކަށްފަހު، ބިލު އަލުން ބަލުން ފުރިހަމަކޮށް، މަޖިލީހަށް ފޮނުވަން ނިންމާފައިއޮތީ، އިތުރު އިޞްލާޙުތަކެއް މަޖިލީހުގައި ހުށަހެޅި ބިލު އޮޅުންބޮޅުން ކޮށްލުމަށް ފުރުޞަތު ވީހާވެސް ކުޑަވާ ގޮތެއްގެމަތިންނެވެ. ނުވަތަ ގިނަ އިޞްލާޙުތަކެއް އެކި ދިމަދިމާލުން ހުށަހެޅި، ބިލު އެއް ރޮއްޖަކުން ވިޔެވިފައިވާ ވިޔެވުން ރޫޅި ނުދިޔުމުގެ ބޭނުމުގައެވެ.

ބިލަކީ، ހުރިހާ ގޮތަކުން ބެލިނަމަވެސް ޚާއްޞަ އުސޫލަކުން މަސައްކަތްކޮށް އަވަސްކުރެވުނު ބިލެކެވެ.

މައިގަނޑު ދެ ޕާޓީގެ ފަރާތުން މަންދޫބުން ހިމެނިގެންނެވެ. އަދި، ޚިޔާލުތަފާތުވުން ހުރި ކަންކަމުގައި، މައިގަނޑު ދެ ޕާޓީގެ ވިސްނުން ހުރިގޮތް ބެލިގެންނެވެ. މެދުމިނުގެ ޙައްލެއް ފެނޭތޯ ބެލިގެންނެވެ.

އެ ހުރިހާ މަސައްކަތަކަށްފަހުވެސް، މައިގަނޑު ދެތިން ކަމެއްގައި، ޑީއާރުޕީގެ ވިސްނުމަށް ކޮމިޓީ ފެންވަރުގައި ޖާގަދެވޭގޮތެއް ނުވިއެވެ.

އެހެންކަމުން، ބިލުގެ މަސައްކަތް ކުރިއަށްގެންގޮސް، ކޮޅެއްގައި ޖެއްސުމުގެ ބޭނުމުގައި، އެއްބަސްވެވުނީ، ބިލު ކޮމިޓީއަށް ފެންނަ ރަނގަޅުގޮތަކަށް ނިންމުމަށެވެ.

އެކަމަކު، ބިލު މަޖިލީހުގެ ތަޅުމަށް ދިޔުމުން، ޑީ.އާރު.ޕީއަށް މުހިންމުވި ކަންކަމުގައި، ބިލަށް އިޞްލާޙު ހުށަހަޅައި މަޖިލީހުން އެކަން ފާސްވޭތޯ ބެލުމަށް ޑީ.އާރު.ޕީއަށް ދޫކޮށްލުމަށެވެ.

މިހެން މިކަން ނިންމުމާއެކުވެސް، އެހެން ޕާޓީތަކާއި މެންބަރުންގެ ފަރާތުންވެސް އިޞްލާޙުތަކެއް އަތުވެދާނެތީ، ކޮމިޓީން، އެ ބިލު ދޫކޮށްލުމުގެ ކުރިން، ޕާޓީތަކަށާއި މިނިވަން މެންބަރުންނަށް އެ ބިލުގެ ދެލިކޮޕީ ފޮނުވުނެވެ. އެ ފަރާތްތަކުގެ އިޞްލާޙަށް އެދެވުނެވެ.

އެ އިޞްލާޙުތައް އައުމުން، އެ އިސްލާޙުތައް ވަކިވަކިން ބަލައި، އޭގެތެރެއިން ހިމެނެންއޮތް އިޞްލާޙުތައް ހިމަނައިދީ ބިލަށް އެ ބަދަލުތައް ގެނެވުނެވެ. އިޞްލާޙުތައް ހުށަހެޅުއްވި ބައެއް ބޭފުޅުން އެ އިޞްލާޙުތަކަށް ވާހަކަދެކެވުނު ވަގުތު އެތަނަށް ވަޑައިގެން އެކަމުގައި ބައިވެރިވެސް ވަޑައިގަތެވެ.

ކޮންމެއަކަސް، އެ މަރުޙަލާގައި ގެނެވުނު ބަދަލުތައް ގެނައުމަށްފަހު، ބިލު ރަސްމީކޮށް މެންބަރުންނަށް ފޮނުވުނެވެ. ދެން، އެއްދުވަހުގެ ފުރުޞަތު ދިނުމަށްފަހު، އެ ރޭ ޖަލްސާ ބާއްވައި، އެ ބިލު މަޖިލީހަށް ހުށަހެޅުނެވެ.

އެ ބިލު، ހުށަހެޅުމުން، އަނެއްކާވެސް މެންބަރުން އިޞްލާޙު ހުށަހެޅުއްވިއެވެ. އަދި، ޕާޓީތަކުންވެސް އިޞްލާޙު ހުށަހެޅުއްވިއެވެ.

ޑީ.އާރު.ޕީގެ ފަރާތުން ދެތިން މައިގަނޑު އިޞްލާޙު ހުށަހަޅާނެކަމަށް ކުރިން ބުނެފައި އޮތްނަމަވެސް، ޖަލްސާ ފެށުމާހަމަޔަށް ދިޔައިރު، އެ އިޞްލާޙުތައް އަށެއްކަ އިޞްލާޙަށް ބަދަލުވެއްޖެއެވެ. އަދި، ފަހުން އެއަށްވުރެވެސް އިތުރުވެއްޖެއެވެ.

ޑީ.އާރު.ޕީން އިޞްލާޙު ހުށަހަޅާކަމަށްވާނަމަ، އެމް.ޑީ.ޕީންވެސް އިޞްލާޙު ހުށަހަޅަން ބޭނުންވެއްޖެއެވެ.

އަދި ނުވިތާކަށް، މިނިވަން މެންބަރުންވެސް އިޞްލާޙު ހުށަހަޅަން ބޭނުންވެއްޖެއެވެ. ޖަލްސާ ހިނގާގަތްއިރު، ހަތްދިހައެއްހާ އިޞްލާޙުގެ ބަންޑެއްޔެއް އުފެދިއްޖެއެވެ.

ޖަލްސާ ހިނގަމުންދިޔަ ވަގުތު، ދެން މަސައްކަތް ކުރެވުނީ، އެ އިޞްލާޙުތައް އަނބުރާ ގެނޭތޯއެވެ. ނުވަތަ މަދުކުރެވޭތޯއެވެ.

ބައެއް އިޞްލާޙުތައް އަނބުރާ ގެންދިޔައެވެ. ބައެއް ކަންކަން ބައެއް މީހުން ދޫކޮށްލިއެވެ. ޑީ.އާރު.ޕީގެ އިޞްލާޙުތައްވެސް މަދުކުރިއެވެ. އަދި، އެމްޑީޕީގެ އިސްލާހުތަކުގެ ބޮޑުބައެއް އަނބުރާގެންދިޔައެވެ.

މިކަހަލަގޮތަކަށްގޮސް ވޯޓާ ޖެހުނުއިރު، ޑީ.އާރު.ޕީގެ އިޞްލާޙާއި އެ ޕާޓީން ތާއީދުކުރާ އިޞްލާޙު އަށަކަށްވުރެ ގިނަވެގެން ހިނގައްޖެއެވެ.

ޖަލްސާގައި މައްސަލަ ޖެހުނުއިރުވެސް، ތޭރަވަރަކަށް އިޞްލާޙު ޑީ.އާރު.ޕީގެ ތާއީދާއެކު ފާސްވެގެން ހިނގައްޖެއެވެ.

ދޮޅުގަޑިއިރު ވަންދެން މެންބަރުން ވޯޓުލާ ނިމުނުއިރުވެސް، އަދިވެސް ވޯޓަށް އަހަންޖެހޭ އިޞްލާޙުތައް ހުރީއެވެ. އަދި، އޭގެތެރޭގައިވެސް ޑީ.އާރު.ޕީން ތާއީދުކުރަންހުރި އިޞްލާޙު ހުރީއެވެ.

އިޞްލާޙު ހުށަނާޅައި، ކޮމިޓީ ފެންވަރުގައި އިޞްލާޙުތައް ގެނެސް، ބިލު ފުރިހަމަކުރެވޭތޯ ކުރެވުނު މަސައްކަތް ނާކާމިޔާބުވީއެވެ. ޑީ.އާރު.ޕީން މުހިންމުވެގެން ކޮންމެހެން ތަޅުމުގައި ހުށަހަޅަން ބޭނުންވި އިޞްލާޙުތައްވެސް، ދެތިން ކަމަކުން، އަށެއްކަ އިޞްލާޙުން ގޮސް، ގިނަވަމުން ދިޔައީއެވެ.

ކޮމިޓީގައި މަސައްކަތްކޮށްގެން، ބިލު ރަނގަޅުކޮށްގެން ގެނައުމުން، އެ މަސައްކަތަށް ތަޅުމުގައި ނެގޭ ވޯޓުން ބަދަލުތައް ގެނެސް، ބިލު އަލުން ލިޔަން އުޅުނު އިތުރު ރެއެއް ފެނުނީއެވެ.

ދަންވަރު ދޭއްޖަހަން ކައިރިވީއެވެ. ޑީ.އާރު.ޕީ މެންބަރުން އެމީހުން ބޭނުންވި އިޞްލާޙުތައް ފާސްކުރަމުން ދިޔައީއެވެ. ބިލަށްވަމުންދިޔަ ގޮތާމެދު ހިތްހަމަނުޖެހި އެމް.ޑީ.ޕީ މެންބަރުން އެމީހުންގެ ހިތްހަމަނުޖެހުން ދައްކަން ފެށީއެވެ.

ޖަލްސާގެ އެހާހިސާބުން މިހާރުގެގޮތަށް ދަންނަވާނަމަ ޖަލްސާ “ފަނިވެ” ކޯޓުތަކުގެ ބިލު “ގޮވީއެވެ.”

ގިނަ މަސައްކަތްތަކެއް ކުރެވިފައިއޮތް ކޯޓުތަކުގެ ބިލު، ދެންމެދެންމެ މަޖިލީހުން ނިމެން، މިނެޓުކޮޅަކަށް ވެފައިވަނިކޮށް، ހުރިހާ މަސައްކަތެއް ފެނަށްދިޔައީއެވެ.

އޯގަސްޓު ނިމި، މަޖިލިސް އެއްމަހުގެ ޗުއްޓީއަށް އެ ދިޔައީ، އެ ބިލު ދޭތެރެމެދަށް ދޫކޮށް، ނަގަމުންދިޔަ ވޯޓެއްގެ ތެރޭގައި އެ ބިލު ތާށިވެފައި އޮއްވައެވެ.