ޕްރީ ސްކޫލްތައް ދައުލަތުން ހިންގުން

ރައްޔިތުންގެ މަޖިލީހުގައި، އިއްޔެއާއި މިއަދު ވާހަކަދެކެވުނު ކަންކަމުގެ ތެރެއިން އެއްކަމަކީ، ޕްރީ ސްކޫލްތައް ރާއްޖޭގައި ހިނގަމުން އަންނަގޮތް ބަދަލުކުރުމުގެ ވާހަކައެވެ. މި ބަހުސް ހިނގާފައިވަނީ، މީދޫ ދާއިރާގެ މެންބަރު އަޙްމަދު ސިޔާމް މުޙައްމަދު ކަމާގުޅޭގޮތުން ހުށަހެޅުއްވި ބިލަކާ ގުޅިގެންނެވެ.

މަޖިލީހުގެ ބަހުސުން މައިގަނޑު ނުކުތާއަކަށް ފާހަގަވީ، ސަރުކާރުގެ ޚަރަދުގައި ޕްރީ ސްކޫލްތައް ހިންގުމުގެ ވާހަކައެވެ.

ރާއްޖޭގެ ޤާނޫނުއަސާސީގެ 36 ވަނަ މާއްދާ ބުނާގޮތުން ފަށާތަޢުލީމާއި މެދުމަދުރަސީ ތަޢުލީމު، ހިލޭ ފޯރުކޮށްދިނުން ދައުލަތަށް ލާޒިމުވެގެންވެއެވެ. އެ މާއްދާ މިހާތަނަށް މާނަކުރެވިފައިވަނީ، ޕްރައިމަރީ ސްކޫލްތަކާއި ސެކަންޑަރީ ސްކޫލްތައް މެދުވެރިކޮށް، ސަރުކާރުން ހިލޭ ތަޢުލީމު ދިނުން ލާޒިމުކުރުމުގެ މައްޗަށެވެ. ޕްރީ ސްކޫލަކީ ފަށާތަޢުލީމުގެ ތެރޭގައި ހިމެނޭ މަރުޙަލާއެއް ނޫންކަމުގެ މައްޗަށެވެ.

ޕްރީ ސްކޫލްގެ ޢުމުރަކީ، ނުވަތަ ޅަފަތުގެ ތަޢުލީމުގެ ޢުމުރުކަމުގައިވާ 1 އަހަރާއި 5 އަހަރާ ދެމެދުގެ ޢުމުރަކީ، ކުއްޖާގެ ސިކުނޑިއާއި ހުނަރުތައް އެންމެ ބާރު ސްޕީޑުގައި ތަރައްޤީވާ ޢުމުރުކަމަށް ދުނިޔޭގައި ކުރެވެމުންދާ ދިރާސާތައް ދައްކައެވެ.

އެ ޢުމުރުގައި ރަނގަޅު ތަޢުލީމަކާއި ތަރުބިއްޔަތެއް ލިބޭ ކުއްޖާ، ފަށާތަޢުލީމާއި މެދުމަދްރަސީ ތަޢުލީމާއި އަދި އެއަށްވުރެ މަތީ ތަޢުލީމުގެ ފުރުޞަތުތައް ރަނގަޅުގޮތުގައި ބޭނުންކުރާ ކަމުގައިވެއެވެ. ޅަފަތުގެ ތަޢުލީމުގެ ފުރުޞަތު ރަނގަޅުގޮތުގައި ނުލިބޭ ކުއްޖާއަށް، ފަށާ ތަޢުލީމާއި މެދުމަދްރަސީ ތަޢުލީމުގެ ދައުރު އެންމެ ފުރިހަމަގޮތުގައި ބޭނުންކުރަން ދަތިވާކަމަށްވެއެވެ. ސްކޫލް ދައުރު ފުރިހަމައަށް ނުނިމުމާއި، ތަޢުލީމީގޮތުން އުޖާލާ ދަރިވަރަކަށް ނުވުމާއި، މައްޗަށް ކިޔަވަން ބޭނުންނުވުމުގެ ސިފަތައް އޭނާގެ ކިބައިން ފެންނަގޮތްވާކަމަށްވެއެވެ.

މި ދެންނެވި ޙަޤީޤަތްތަކުގެ މައްޗަށް ބަލާއިރު، އެންމެ މުހިންމު އިސްކަމެއް ދޭންޖެހޭ ތަޢުލީމުގެ ދައުރަކީ، ޅަފަތުގެ ތަޢުލީމު ނުވަތަ ޕްރީ ސްކޫލުގެ ދައުރުކަމުގައި ބަލަން އެބަޖެހެއެވެ.

އެހެންކަމުން، ފަށާތަޢުލީމާއި މެދުމަދްރަސީ ތަޢުލީމު ދައުލަތުން ހިލޭ ފޯރުކޮށްދިނުން ލާޒިމުކަމަށް ޤާނޫނުއަސާސީ ބުނާނަމަ، ޅަފަތުގެ ތަޢުލީމު ހިލޭ ފޯރުކޮށްދިނުމުގެ އުސޫލެއް، ޤާނޫނުން ލާޒިމުކުރުމުގެ އުސޫލަކީ، ތަޢާރުފުކުރަން ވިސްނިދާނެ އުސޫލެއްކަމަށް ޤަބޫލުކުރެވެއެވެ.

އެ އުސޫލު އެގޮތަށް ޤާނޫނަކުން ތަޢާރުފުކުރެވިއްޖެނަމަ، މިހާރު ކަންހިނގާގޮތަށް އިންޤިލާބީ ބަދަލެއް އަންނާނެއެވެ.

ކޮންމެ ރަށެއްގައިވެސް، ސަރުކާރުން ހިންގާ ނުވަތަ ޚަރަދު ބަލަހައްޓައިދޭ އެއް ޕްރީ ސްކޫލް ހުރުން ލާޒިމުވެގެންދާނެއެވެ. އަދި، ރާއްޖޭގައި ހިންގާ ޕްރީ ސްކޫލްތައް އެއް އުސޫލަކަށް ހިނގާގޮތަށް ހަމަޖެހި، އެ ސްކޫލްތަކުން ހިންގާ ޕްރީ ސްކޫލްގެ ޕްރޮގްރާމްތައް އެއްހަމައަކަށް ފެތިގެންދާނެއެވެ.

މި މައްސަލަ ޙައްލުވެގެންދާނެ ގޮތެއް އެނގޭނީ، މަޖިލީހަށް މިއަދު ބަލައިގަތް އަޙްމަދު ސިޔާމް މުޙައްމަދުގެ ޕްރީ ސްކޫލް ބިލު ނިމި، ޤާނޫނަކަށް ވެގެންދާ ހިސާބުންނެވެ. އެކަމަށް އަދި ދުވަސްކޮޅެއް ވެދާނެއެވެ.